Author Archive

எமது முன்னோர்களில் ஒருவர் அவருடைய வீட்டை விட்டு வெளியேறும் போது அவரைப் பார்த்து அவருடைய குடும்பத்தினர் “ஹராமான சம்பாத்தியத்தை விட்டும் எச்சரிக்கையாக இருந்து கொள்ளுங்கள், ஏனெனில் எம்மால் பசியைத் தாங்கலாம், ஆனால் நரக நெருப்பைத் தாங்க முடியாது” எனக் கூறுவார்கள்.

முஹ்தஸரு மின்ஹாஜில் காஸிதீன் (2/16)

இமாம் ஷஃபீ (ரஹிமஹுல்லாஹ்) ஒரு விடயத்தைப் பற்றி கேட்கப்பட்டார். அவரோ “எனக்குத் தெரியாது” என்று கூறினார்.

அப்போது அவரிடத்தில் “நீங்கள் ஈராக் நாட்டின் மார்க்க மேதையாக இருக்கிறீர்கள், “எனக்குத் தெரியாது” என்று சொல்வதற்கு உங்களுக்கு வெட்கமாக இல்லையா?” என்று கூறப்பட்டது.

அதற்கு அவர் “வானவர்கள் (அல்லாஹ்விடம்) (உன்னை நாம் துதி செய்கிறோம், நீ கற்றுத்தந்த அறிவைத் தவிர வேறு எந்த அறிவும் எங்களுக்கு இல்லை) என்று கூறும்போது அவர்களும் வெட்கப்படவில்லையே” என்று பதிலளித்தார்கள்.

அல்பகீஹ் வல்முதபக்கிஹ்: 2/370

அதிகமான நோயாளிகள் மாத்திரைகளின்றியே நிவாரணம் பெறுகின்றனர். ஏற்றுக்கொள்ளப்பட்ட துஆவைக் கொண்டு அல்லது பிரயோசனமான ஓதிப் பார்த்தல் முறையைக் கொண்டு அல்லது உள்ளத்தில் உள்ள பலத்தைக் கொண்டு அல்லது அல்லாஹ்வின் மீதுள்ள சிறந்த நம்பிக்கையைக் கொண்டு அவர்கள் நோய் நிவாரணம் பெறுவர்.

மஜ்மூஉல் பதாவா: 12/563

அறிஞர் இப்னுல் கைய்யிம் [ரஹிமஹுல்லாஹ்] கூறுகின்றார்:

தொழுகை

1.வாழ்வாதாரத்தை பெற்றுத்தரும்

2.ஆரோக்கியத்தை பாதுகாக்கும்.

3.நோவினைகளை தடுத்து விடும்.

4.நோய்களை விரட்டி விடும்.

5.உள்ளத்தை பலப்படுத்தும்.

6.முகத்தை வெண்மையாக்கும்.

7.உள்ளத்தை சந்தோஷப்படுத்தும்.

8.சோம்பேறித்தனத்தைப் போக்கி விடும்.

ஸாதுல் மஆத்: 4/304

தொழுகையில் கண்களை மூடுவது வெறுக்கப்பட்டது என்பதே சரியான கருத்தாகும். ஏனெனில், நெருப்பை வணங்கும் போது கண்களை மூடிக்கொள்கின்ற நெருப்பு வணங்கிகளின் செயலுக்கு இது ஒப்பாகின்றது.

அஷ்ஷர்ஹுல் மும்திஃ: 3/41

நபி ஸல்லல்லாஹு அலைஹி வஸல்லம் அவர்கள் கூறினார்கள்:

உயிர்த் தியாகிகள் ஐந்து பேர்கள் ஆவர்:

1. பிளேக் நோயால் இறந்தவர்

2. வயிற்று(ப் போக்கு போன்ற) வியாதிகளால் இறந்தவர்

3. தண்ணீரில் மூழ்கி இறந்தவர்.

4. வீடு, கட்டிடம் ஆகியவை இடிந்து விழும் போது) இடிபாட்டில் சிக்கி இறந்தவர்

5. இறைவழியில் (அறப்போரில் ஈடுபட்டு) இறந்தவர்.

(புஹாரீ: 2829)

அஷ்ஷெய்ஹ் இப்னுபாஸ் (ரஹிமஹுல்லாஹ்) கூறுகின்றார்:

வாகனங்கள் மோதிக் கொள்வதன் காரணமாக அல்லது தடம்புரள்வதின் காரணமாக இறப்பவர்களும் இவர்களில் உள்ளடங்குவர்.

அவர்கள் இடிபாடுகளில் சிக்கி இறப்பவர்களுக்கு ஒப்பாகின்றனர். இவர்களும் ஷஹீத்களாக இருப்பார்கள் என்று எதிர்பார்க்கப்படுகிறது.

ஆனாலும், வயிற்று வியாதிகளால் இறந்தவர்கள் அல்லது நீரில் மூழ்கி இறந்தவர்களைப் போன்று வாகன விபத்துக்களால் இறந்தவர்களும் குளிப்பாட்டப்பட வேண்டும். மேலும் அவர்களுக்கு ஜனாஸா தொழுவிக்கப்பட வேண்டும்.

பதாவா “நூருன் அலத்தர்ப் (3/1426)

ஒலிம்பிக் உட்பட பல விளையாட்டு நிகழ்வுகளில் இடம்பெறக்கூடியதே குத்துச்சண்டை விளையாட்டாகும். இச்சண்டையில் போட்டியிடும் இரு வீரர்களும் ஒருவர் மற்றவரின் முகத்தைக் காயப்படுத்துவதை நாம் பார்க்கலாம்.

அந்த அடிப்படையில் இவ்விளையாட்டு மார்க்கத்தில் தடைசெய்யப்பட்டதாக அமைகின்றது. ஏனெனில், இன்னொரு சகோதரரின் முகத்தைக் காயப்படுத்துவது மார்க்கத்தில் ஹராமாகும்.

நபி ஸல்லல்லாஹு அலைஹி வஸல்லம் அவர்கள் கூறினார்கள்: உங்களில் ஒருவர் (எவரையாவது) தாக்கினால் முகத்(தில் அடிப்ப)தைத் தவிர்க்கட்டும். (புஹாரீ: 2559, முஸ்லிம்: 6817)

மேலும், கூறினார்கள்: உங்களில் ஒருவர் (எவரையாவது) தாக்கினால் முகத்தில் அறைய வேண்டாம். (முஸ்லிம்: 6820)

அல்ஹாபிள் இப்னு ஹஜர் (ரஹிமஹுல்லாஹ்) கூறுகின்றார்: மார்க்க ரீதியான தண்டனைகளாக இருந்தாலும், அல்லது ஒருவரை திருத்துவதற்காக, ஒழுக்கமூட்டுவதற்காக முகத்தில் அடிப்பதும் ஹதீஸில் குறிப்பிடப்பட்ட தடைக்குள் உள்ளடங்கும். (பத்ஹுல் பாரீ: 5/183)

எனவே, இன்னொரு சகோதரனின் முகத்தைக் காயப்படுத்தும் இத்தகைய விளையாட்டுக்கள் ஒரு முஸ்லிமுக்கு உகந்ததல்ல.

அஷ்ஷெய்ஹ் ஸாலிஹ் அல்பவ்ஸான் (ஹபிளஹுல்லாஹ்) கூறுகின்றார்:

அதிகமான தந்தைமார் தமது பிள்ளைகள் குறித்து எதையும் அறியாதவர்களாக இருந்து வருகின்றனர்.

இவர்கள் தமது பிள்ளைகளுக்குத் தேவையான உணவு, குடிபானம், ஆடை, வதிவிடம் ஆகியவற்றை நிரப்பமாகப் பெற்றுக் கொடுப்பார்கள். இது தவிர்ந்த பிள்ளைகளின் ஏனைய விவகாரங்களை அறியாதவர்களாக இருப்பார்கள்.

தமது பிள்ளைகள் குறித்து விசாரிக்கமாட்டார்கள், அவர்களைப் பின்தொடர்ந்து கவனிக்கமாட்டார்கள், அவர்கள் எங்கு செல்கிறார்கள், யாருடன் பழகுகிறார்கள், எதைக் கற்கின்றார்கள் போன்றவற்றை அறியாதவர்களாக இத்தந்தைமார் இருந்து வருகின்றனர்.

இப்படிப்பட்ட தந்தை இருப்பதில் எவ்விதப் பயனுமில்லை. இவர்கள் இருப்பதைவிட இல்லாமல் பிள்ளைகள் அநாதையாக வளர்வது சிறந்தது.

ولا حول ولا قوة إلا بالله.

நூல்:
அல்ஹுதபுல் மின்பரிய்யா: 7/233